FULIDAIDAI: Dalan Kultural ba Dezenvolvementu Kooperativu

antero BENEDITO DA SILVA*

Iliomar, sub-distritu distansia ida iha Lospalos ho populasaun hamutuk mane 3.406 no feto 4.211 iha tinan 2007 kotuk. Iliomar mos sai baze da resistensia no nia emar sira sai sujeitu ba lei antagonika rejimu militar Indonesia nian husi 1976 too 1999. Karik tanba nee, espiritu servisu hamutuk, solidariedade sosial sei makaas tebes. Hanesan mos Povu Maubere sira seluk, povu Iliomar sira depende makaas tebes ba ekonomia subsistensia katak produz ba nesesidade uma-laran nian deit. Rai neebe sira manejia nee, rai kolektivu klan nian. Sira nia dialetu mak Makaleru.

Povu Iliomar hakiak tradisaun solidariedade sosial ida neebe konesidu ho naran Fulidaidai ka Horu-Horu iha lian Fataluku  nian. Fulidaidai iha potensia atu sai movimentu social ekonomia baze hodi fo alternativu ba prosesu ne’ebe lao dadaun iha Timor-Leste. Primeiru, komunidade sira defini Fulidaidai liu husi terminolojia lian Tetun rua: hari lutu hamutuk no lao hamutuk. Hari lutu hamutuk katak tau bareiras  ka defesa hodi hases toos ka natar komunidade nian husi animal fuik sira atu la estraga aihan sira. Pratika ida nee komun iha sosiedade orijinal agrikulu sira iha neebe deit. Lao hamutuk katak servisu hamutuk ka tulun malu. Kumunidade sira servisu hamutuk; hari uma-hela fatin ka uma fukun, halo toos-natar hamutuk, halao atividades fetosa-umane no eventus rituais fiar nian. Segundu, Fulidaidai nee konseitu solidariedade social. Lao hamutuk katak tulun malu, koidadu membru sira nia moris umana iha tempu hotu-hotu; susar no diak.

Terseiru, Fulidaidai mos katak feto klosan sira lao hamutuk apriende soru tais ho sira nia bin no inan sira iha komunidade nia laran.  Tais nee hatais indigenas Timor nian neebe ninia motivu ho kores oioin no furak tebes. Fulidaidai iha sentidu nee katak feto klosan sira apriende hamutuk soru tais ne’ebe sai tradisaun ida hodi hatutan jerasaun ba jerasaun. Katak soru tais nee pratika obrigatoria ida ba feto sira. Se ita aplika karik konseitu nee ba lisan edukasaun ohin loron nian, Fulidaidai bele mos sai movementu edukasaun popular ida ba membru komunidade sira atu tau hamutuk sira nia matenek, badaen no rikursu hodi halao atividade komunitariu ne’ebe responde ba sira nia nesesidades umana ba moris ohin no loron aban ne’ebe diak liu no sustentabel. Kuartu, povu Makaleru sira mos kontinua promove ideas ukun-rasik-an. Ukun rasik-an nia signifika paralelu ho auto-sufisinesia ekonomia no independensia politika. Nunee fiar ba ukun-rasik-an katak komunidade Makaleru sira bele kontribui ba dezenvolve sistema politika, sistema ekonomia, sosial no uza Timor nia rikursus lokais ba Timor oan hotu  nia moris diak.

Tuir mai, prinsipius Fulidaidai balun ne’ebe mak ita kompara ho prinsipius kooperativu mai husi ICA (International Cooperative Aliance). Prinsipius Fulidaidai sira nee halibur husi seria diskusaun neebe autor halao ho Iliomar oan sira tinan kotuk 2007.

Maske komunidade lokal reklama katak sira parte ba partido ida deit mak FRETILIN no relijiaun ida deit mak Katolika, movementu feto seidauk forti fali hanesan tempu resistensia nian. Fulidaidai bele sai dalan ida hodi hamosu fila fali espiritu popular partidu resistensia, FRETILIN nian iha area nee. Dezafios mak nee, Fulidaidai karik presija hametin ninia karater popular no koko lao ses husi kontrola estrutura nian no transforma ba movementu dezenvolvementu popular ida. Konserteza Estado, hanesan kapital politik bele halo intervensaun nesesariu ruma, exemplu, iha area konsientizasaun, dezenvolvementu institusional no fo subsidiu ruma ne’ebe bele kria independensia kolektivu.  Prosesu lao dadaun; existe ona instituisaun ida hanaran Sentru Kooperativu Haburas Kultura Timor (SKHKT) neebe temporaria baze iha desloku fatin Metinaru nian. Grupu nee halo ona diskusaun lubuk ida kona lideransa kolektiva, estrutura kooperativu, prinsipius basika sira no planu ba oin nian. S KHKT bele kaer knar importante iha area konsiensializasaun no dezenvolve badaen membru Fulidaidai sira nian iha futuru. Feto Lospalos sira organiza-an ona ba grupu tolu ho membru besik nain 60 resin no grupu sira nee servisu ho S KHKT. Sira iha faze inisiu oinsa mak laos deit promove Fulidaidai hanesan movementu sosial ekonomia ida maibe mos dudu knar feto iha movementu sira nee. Grupu feto sira nee lao neneik, maibe produz ona tais no souvenir hodi faan iha loja sira iha Dili laran no ba faan iha Australia liu husi nukleu fair trade (merkadu justa) nian iha Melbourne. Maibe produz tais nee atividade ida deit. Grupu seluk tan mak halao dadaun mos atividade seluk; Uniaun Kreditu, grupu karpinteiru, grupu agrikultur sira no seluk-seluk tan neebe ladauk lao hamutuk ho S KHKT. Komunidade KainLiu balun, pur ezemplu, ho apoiu Care Internasional nian hari ona Community Saving, rai osan komunidade nian ho nia total tinan kotuk 2007 hamutuk US$ 10,000. Kapasidade nee bele utiliza didiak hodi dudu dezenvolvementu lokal no la depende ba tulun husi fatin seluk, ka husi Banku Konvensional sira. Membru sira bele impresta osan neebe hodi hadia sira nia uma neebe natoon ho kualidade diak. 

Difikuldades neebe sira infrenta, tuir Ofisiais Dezenvolvementu Sub-distritu Iliomar nian mak nee: limitada iha esperiensia no badaen ba manajementu grupu, ho transporte atu distribui komunidade nia produtu ba konsumidores lokais iha fatin seluk. Difikuldades sira nee mos sai oportunidade bussiness kolektivu Fulidaidai nian. Ikus liu, hametin tradisaun Fulidaidai hatudu epoka foun ida ba dezenvolvementu kooperativu iha Timor-Leste. Pratika Fulidaidai existe mos iha komunidade Maubere sira seluk; Kawak (Bunak), Hakawak (Tetun Terik), Figuini (Makasae), Arosan Laklubar, Slulu (Mombae) no Ulu-Ini (Nauheti). Presija tau atensaun ba pratika sira nee hodi dudu kooperativu hanesan dalan ida ba komunidade lokal atu kontrola sira nia ekonomia rasik. Tuir Wolden Belo husi Focus Global South baze iha Universidade Chulalongkorn, Thailandia katak "dezenvolve ekonomia lokal sai dalan ida atu dudu de-globalizasaun no kooperativu sai parte fundamental ba luta nee."

*) Estudante MBS iha Kooperativu no Sosial Enterprise, Universidade Kolejio Cork, Irlandia